(ବରଗଡ଼) ଗଣ ଇସ୍ତାହାର ୧୫/୧୧ - ଜାତିର ଜନକ ମହାତ୍ମାଗାନ୍ଧୀଙ୍କ ୧୫୦ ତମ ଜୟନ୍ତୀ ବର୍ଷ ପାଳନ ଅବସରରେ ରାଜ୍ୟ ସରକାରଙ୍କ ଗଣ ଶିକ୍ଷା ବିଭାଗ ପକ୍ଷରୁ ପ୍ରକାଶିତ ପ୍ରଚାର ପୁସ୍ତିକା ରେ ହୋଇଥିବା ଗୁରୁତର ତୃଟୀକୁ ନେଇ ସାରା ରାଜ୍ୟରେ ହଇଚଇ ସୃଷ୍ଟି ହୋଇଛି । ଏହି ପୁସ୍ତକରେ ଗାନ୍ଧୀଙ୍କ ମୃତ୍ୟୁ ଆକସ୍ମିକ ଭାବରେ ଘଟିଥିଲା ବୋଲି ଉଲ୍ଲେଖ ରହିଛି । ଗଣ ଇସ୍ତାହାର ଡ଼ଟ କମ ର ତା.୧୪.୧୧ ସଂସ୍କରଣରେ ଏନେଇ ବିଭିନ୍ନ ବ୍ୟକ୍ତି ବିଶେଷଙ୍କ ପ୍ରତିକ୍ରିୟା ପ୍ରକାଶ ପାଇଥିଲା । ଦେଶର ପ୍ରମୁଖ ୱେବ ପୋର୍ଟାଲ ଦ ଓô୍ାୟାର ରେ ଏହି ଖବରଟି ପ୍ରକାଶ ପାଇବା ପରେ ରାଜ୍ୟ ତଥା ଦେଶର କୋଣ ଅନୁକୋଣରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । ଇଂରାଜୀ ଦୈନିକ ଦ ଟାଇମ୍ସ ଅଫ ଇଣ୍ଡିଆ ମଧ୍ୟ ଏହି ଖବରକୁ ଆଜି ପ୍ରମୁଖତାର ସହିତ ଛାପିଛି । ତେବେ ଆମ ରାଜ୍ୟର ପ୍ରମୁଖ ଖବର କାଗଜ ଏବଂ ଟିଭି ଚାନେଲ ଗୁଡ଼ିକ ଏହି ଖବର ପ୍ରକାଶନ ଏବଂ ପ୍ରସାରଣରେ ପ୍ରମୁଖ ଖବର ଭାବରେ ସ୍ଥାନ ଦେଇ ନଥିବାରୁ ବିଭିନ୍ନ ମହଲରେ ରାଜ୍ୟର ଗଣ ମାଧ୍ୟମର ଆଭିମୁଖ୍ୟକୁ ନେଇ କଡ଼ା ସମାଲୋଚନା ହେଉଛି । ଜାତିର ଜନକ ମହାତ୍ମାଗାନ୍ଧୀଙ୍କ ୧୫୦ ତମ ଜୟ ଜୟନ୍ତୀ ପାଇଁ ରାଜ୍ୟର ସମସ୍ତ ଖବର କାଗଜ ଗାନ୍ଧୀଙ୍କ ସପର୍କିତ ବିଭିନ୍ନ ଲେଖା, ଫଟୋ, ସାହିତ୍ୟ, କବିତା ଆଦି ଛାପୁଥିବା ବେଳେ ଏଭଳି ଏକ ସମ୍ବେଦନଶୀଳ ପ୍ରସଙ୍ଗକୁ ପ୍ରମୁଖତା ନ ଦେବା ପଛରେ କଣ ରହସ୍ୟ ରହିଛି ବୋଲି ପାଠକ ମହଲରୁ ପ୍ରଶ୍ନ ହେଉଛି । ସେହିପରି ରାଜ୍ୟ ସରକାର ଏଭଳି ଏକ ପ୍ରସଙ୍ଗରେ ଚୁପ ନ ରହି ତୁରନ୍ତ ତୃଟୀ ପୂର୍ଣ୍ଣ ପ୍ରଚାର ପୁସ୍ତିକାକୁ ପ୍ରତ୍ୟାହାର କରାଯାଇ ପ୍ରକୃତ ତଥ୍ୟ ଓ ସତ୍ୟ ସମ୍ମଳିତ ପ୍ରଚାର ପୁସ୍ତିକା ପିଲାଙ୍କ ପାଇଁ ପ୍ରସ୍ତୁତ କରନ୍ତୁ ବୋଲି ଦାବି କରାଯାଉଛି ।
